​Hiji léngkah bersejarah pikeun warga Desa Cimacan, Kacamatan Cipanas, resmi dicitak poé ieu. Lahan anu legana 1,6 héktar sarta geus mangpuluh-puluh taun teler (terbengkalai), ayeuna resmi pindah status jadi hak Pamaréntah Desa Cimacan. Ieu kasuksésan téh teu leupas tina perjuangan getas harupat Kapala Desa Cimacan, Haji Deden Ismail, kalayan dirojong pinuh ku Anggota DPRD Kabupatén Cianjur, Usep Setiawan.

​Bupati Cianjur, Dr. Muhamad Wahyu Ferdian, sacara langsung masrahkeun éta lahan ka Pamaréntah Desa Cimacan. Dina biantarana, Bupati negeskeun yén panyerahan aset ieu tujuanna murni pikeun kapentingan sarta ngaronjatkeun ékonomi masarakat satempat.

​"Kagiatan poé ieu téh masrahkeun lahan ti Pemkab ka Pamaréntah Desa Cimacan pikeun dimanfaatkeun keur kapentingan masarakat. Di dieu bakal diwangun sarana olahraga, fasilitas umum, lahan terbuka, dugi ka koperasi. Kami miharep ieu tiasa janten cukang lantaran ékonomi warga," saur Dr. Muhamad Wahyu Ferdian.


​Bupati ogé méré amanat sangkan Desa Cimacan ngaoptimalkeun poténsi wisatana ku cara ngajaga kabersihan, kalestarion lingkungan, sarta ngajungjung luhur ajén budaya warisan karuhun sangkan narik wisatawan domestik boh mancanagara.

​Rencana Pangwangunan dumasar Site Plan:

​Dumasar kana site plan anu geus disusun, éta lahan strategis téh bakal dirobah jadi puseur palayanan sarta kagiatan masarakat anu modern. Rencana pangwangunanna ngawengku:

  • ​Kantor Desa Cimacan anu leuwih representatif.
  • ​Gedung Koperasi Desa Merah Putih.
  • ​Gedung Olahraga (GOR).
  • ​Lapangan Maén Bal standar FIFA.

​Ngeunaan kumaha panggunaan lahan anu leuwih éféktif, saterusna bakal diputuskeun ngaliwatan mékanisme Musyawarah Desa (Musdes).

​Réspon ti Tokoh Masarakat

​Kapala Desa Cimacan, Haji Deden Ismail, nepikeun rasa barungah sarta hatur nuhun kana kawijakan Bupati anu mungkas antosan panjang warga salila mangpuluh-puluh taun.

"Poé ieu téh poé kabagjaan pikeun warga Desa Cimacan. Pak Bupati kalayan kasaéan sareng kawijakanana parantos maparin hak kana ieu tanah. Kami komit pikeun ngaberdayakeun ieu lahan sangkan poténsi wilayah anu aya tiasa optimal," ceuk Haji Deden.

​Sajalan jeung éta, Usep Setiawan, Anggota DPRD Cianjur ti Fraksi Partéi Demokrat anu milu ngawal ieu prosés, méré aprésiasi anu kacida luhurna ka pamaréntah daérah.

"Alhamdulillah, ku tina handap asorna Pak Bupati, tanah anu dinanti-nanti legalitasna ieu ayeuna tos bersertifikat hak pakai atas nami pamaréntah desa. Ieu mangrupikeun kameunangan kanggo sakumna warga Desa Cimacan," pungkasna.

​Laporan: Tarsono