CIANJUR, JAWA BARAT – Aya béja gumbira pikeun masarakat Kacamatan Pacet jeung sabudeureunana. Kawasan Car Free Day (CFD) Gadog anu biasana jadi puseur olahraga unggal poé Minggu isuk, ayeuna salin rupa jadi puseur Ngabuburit Ramadhan salila bulan suci ieu.
Ti mimiti awal Ramadhan, aréa CFD Gadog bakal dijadikeun kawasan husus keur nu leumpang unggal soré salila sabulan pinuh. Ieu tarékah téh dilaksanakeun pikeun méré rohang anu aman tur merenah pikeun warga anu hayang ngadon ngabuburit nunggu waktu buka puasa.
Béda jeung suasana CFD isuk-isuk anu pinuh ku nu olahraga, CFD Gadog édisi Ramadhan bakal disulap jadi pasar takjil anu rongkah. Para pangunjung bakal dimanjakeun ku rupa-rupa kadaharan has bulan puasa, di antarana:
- Rupa-rupa Kolek: Ti mimiti kolek cau, biji salak, nepi ka kolek hui anu amis tur haneut.
- Menu Has Cianjur: Rupa-rupa opieun tradisional anu matak ngahudang rasa.
- Inuman Seger: És campur, és kalapa ngora, jeung rupa-rupa inuman nu keur usum pikeun nyageurkeun tikoro.
- Deungeun Sangu: Ngagampangkeun Ibu-ibu milari lauk pauk pikeun buka puasa sangkan teu kudu masak deui di imah.
Ieu acara ngabuburit di aréa CFD Gadog téh bakal dimimitian unggal poé tabuh 15.30 WIB nepi ka deukeut waktu magrib. Petugas anu patali bakal nutup jalan sawatara waktu pikeun mastikeun kanyamanan warga anu keur jalan-jalan milari takjil.
"Sim kuring hoyong ngahadirkeun suasana Ramadhan anu ramé tapi tetep tartib. Ku ayana CFD Ngabuburit ieu, ékonomi lokal palaku UMKM di Pacet dipiharep tiasa nérékél naék, sarta warga gaduh tempat anu merenah kanggo milari tuangeun buka," ceuk wawakil panata calagara.
Sakumna warga Cianjur jeung wisatawan anu nuju aya di kawasan Cipanas-Pacet diondang pisan pikeun ngararamékeun suasana soré di Gadog. Utamakeun jaga kabersihan ku cara miceun sampah kana tempatna sarta ngajaga katartiban babarengan. Laporan : Tarsono