Ketua Koordinator Aliansi Mahasiswa jeung Rakyat Cianjur, Abah Suhe. (Foto: Ali).
Cianjur | Rencana diayakeunna Karnaval Mahkota Binokasih Sanghyang Pake (MBSP) anu dijadwalkeun lumangsung soré ieu, Rebo (6/5/2026), meunang panolakan teuas ti Aliansi Mahasiswa jeung Rakyat Cianjur.
Sababna lain tanpa alesan. Di tengah-tengah korban bencana pergerakan taneuh di Cianjur Kidul anu masih kénéh terlantar tur kakurangan bantuan, éta pintonan dinilai malah ngahambur-hamburkeun anggaran nagara keur pésta pora.
Ketua Koordinator Aliansi Mahasiswa jeung Rakyat Cianjur, Abah Suhe, kalayan sora bedas nepikeun rasa kuciwana.
“Makuta Binokasih téh mangrupa simbol makuta raja Sunda. Fungsina pikeun ngingetkeun peran raja minangka panyalindungan jeung panyebar asih ka rahayatna. Lain keur pésta karnaval dina mangsa rahayatna jadi korban bencana jeung masih kénéh terlantar,” tegas Abah Suhe ka wartawan, Rebo (6/5/2026).
Abah Suhe ogé nanyakeun tujuan di balik karnaval éta. Naon nu diteang ku Gubernur Dedi tina ieu karnaval? Lamun néangan éléktoral, KDM kudu diréhabilitasi méntalna!.
“Dina mangsa masarakat loba nu jadi sangsara, anggaran nagara malah dipaké pésta pora,” pokna kalayan nada luhur.
Mantenna nambahan, geus waktuna pamingpin nyonto harti sajati Makuta Binokasih, lain saukur dijadikeun atraksi.
“Cukup Makuta Binokasih jadi cekelan ajaran pamingpin Sunda, lain jadi alat pésta ngahambur-hamburkeun anggaran nagara dina mangsa masarakat kaimpit bencana jeung ékonomi,” sambungna.
Dina pedaranana anu leuwih anteb, Abah Suhe méré conto sosok Eyang Surya Kencana anu justru diwujudkeun dina wujud kampus pikeun nyerdaskeun kahirupan bangsa.
“Di Cianjur aya Eyang Surya Kencana. Wujudna kampus, lain naék kuda kencana ngahambur-hamburkeun anggaran nagara dina mangsa rahayat sangsara,” pungkasna.
Nepi ka ieu warta diturunkeun, boh panitia panyelenggara boh pihak Pemprov Jabar tacan méré tanggapan resmi patali jeung panolakan éta.
