(Foto: Ilustrasi/AI)
Cianjur | Puluhan emak-emak warga Kampung Raksabala RW 02, Désa Ramasari, Kacamatan Haurwangi, Kabupatén Cianjur, Jawa Barat, ngayakeun unjuk rasa dina dinten Jumaah (08/05/26) kira-kira tabuh 14.00 WIB.
Aksi protés ieu dilakukeun pikeun nolak ayana jualan obat-obatan terlarang (narkoba), malah nepi ka aya aksi ngaduruk bangku jeung méja anu mindeng dijadikeun tempat transaksi narkoba.
Dumasar kana inpormasi anu ditihtih, unjuk rasa emak-emak téh dipicu ku rasa keuheul ka oknum pamuda anu mindeng ngajual narkoba di hiji imah kosong di sisi Jalan Raya Cianjur-Bandung, pasna di Kampung Raksabala.
Ieu aksi dilaksanakeun margi masarakat, utamana para ibu, tos ngarasa muak sarta jéngkél. Paripolah oknum anu unggal dinten disangka ngajual narkoba téh tos sababaraha kali dilaporkeun ka pihak désa, nanging teu aya tindak lanjutna. Alhasil, emak-emak pamustunganana lungsur langsung ngayakeun unjuk rasa.
"Sim kuring miharep pihak anu berwajib énggal-énggal ngaberantas sarta ngeureunkeun jualan obat terlarang ieu, margi tos ngaruksak generasi ngora, utamana barudak ngora di wilayah Kacamatan Haurwangi," saur Apud, tokoh masarakat Raksabala.
Samentawis éta, Ketua RW 02, Enung Kartini, nambihan yén sabada emak-emak ngalaksanakeun protés nolak sumebarna obat-obatan terlarang, pihak pamaréntah dipiharep tiasa énggal-énggal nindaklanjutan supados Kampung Raksabala bébas tina narkoba.
"Ka pihak pamaréntah, sim kuring nuhunkeun énggal nindaklanjutan perédaran narkoba di wilayah Kacamatan Haurwangi, Cianjur, margi éta téh ngaruksak méntal generasi ngora," pungkasna.
