Hoerudin padagang bandera konvensional jualan bandera sisi jalan raya di Cianjur. (Poto : Ali).

Cianjur, sunda_update,- Mieling Poé Kamerdékaan Républik Indonésia anu ka-81, para padagang bandéra musiman di sisi jalan raya Cianjur ngeluhkeun omzetna anu turun drastis. Maranéhna ngarasakeun jemplingna nu meuli téh lantaran eleh saing ku nu jualan online nu nawarkeun harga jauh leuwih murah.

Salah saurang padagang bandéra di salah sahiji lapak sisi jalan di Cianjur Hoerudin, ngaku yén omzetna ayeuna mah anjlok pisan dibandingkeun jeung taun-taun saméméhna. Manéhna malah can kawakan ngajual sanajan hiji bandéra wae nepi ka poé ieu.

"Anjlok pisan. Di unggal lapak, komo di unggal kota oge méh kabéh pada ngeluh. Meureun lantaran kalah saing jeung jualan online anu hargana murah pisan. Boh umbul-umbul, bandéra, atawa background téh hargana rendah pisan lamun meuli online," keluhna, Senen (3/8/2026).

Pikeun narik nu meuli, Hoerudin méré harga bandéra ukuran sedeng Rp35.000, sedengkeun anu ukuran gedé mah Rp45.000. Harga téh manéhna pasrahkeun sanggeus tawar-menawar jeung nu meuli, sanajan sok aya ogé anu nawarna jauh teuing tina harga anu dijual.

"Lamun dibandingkeun jeung online, memang jauh pisan. Contona, meuli background di lapak téh Rp250 rébu, tapi di online bisa meunang Rp140 rébu. Anu ngabédakeun mah lamun di dieu barangna katingali langsung, ari di online mah henteu," jelasna ngabandingkeun kualitas barang anu bisa langsung katingali ku nu meuli di lapakana.

Persaingan harga ieu jadi pukulan beurat pikeun para padagang konvensional. Numutkeun Hoerudin, padagang online bisa nawarkeun produk kalawan harga anu jauh leuwih handap. Lamun hargana bisa sarua, meureun para padagang di lapak moal ngarasa anjlok pisan kieu. 

Turunna omzet anu dirasakeun ku manéhna diperkirakeun nepi ka 60 persén dibandingkeun jeung taun kamari.

Sanajan kitu, manéhna masih miharep aya kanaékan penjualan dina puncak perayaan HUT RI anu bakal datang. 

"Turunna anu kuring rasakeun téh bisa nepi ka 60 persénan ti taun kamari, ari taun ieu mah tingali engké dina tanggal 16 Agustus," pungkasna.