Sanajan Dana Desa Dikurangan Warga Desa Gelaranyar Rela Swadaya Pangwangunan. (Poto: Ali).

Cianjur, sunda_update,– Sanajan anggaran Dana Desa ngurangan kulantaran dialokasikeun kana kalangsungan Koperasi Desa Merah Putih (KDMP), sumanget gotong royong konsisten ditembongkeun ku warga Desa Gelaranyar, Kacamatan Pagelaran, Kabupaten Cianjur.

Dina prak-prakanana warga babarengan jeung pamarentah desana silih rojong ku gotong royong ngadorong kalangsungan pangwangunan infrastruktur di wilayahna.

Dumasar pantauan di lapangan dina Saptu (17/10/2026), Kepala Desa Gelaranyar Jenal, S.Pd., turun langsung babarengan warga ngalaksanakeun gotong royong di Kp. Nyengked 03/03. Kagiatan eta mangrupa pangwangunan jalan jeung sasak ku swadaya masarakat.

Anjeuna nyarioskeun, yen gotong royong eta mangrupa ciri has warga Desa Gelaranyar. Numutkeun anjeunna, kagiatan eta boga tujuan pikeun nguatkeun rasa paduli ka sasama warga teu ningali status sosial jeung teu mentingkeun kapentingan pribadi.⁸⁸

“Naha gotong royong di desa kami tetep digalakkeun? Sabab warga Desa Gelaranyar ayeuna leuwih fokus kana palaksanaan pangwangunan infrastruktur. Di tengah nguranganana anggaran ayeuna, warga sacara sukarela ngalaksanakeun pangwangunan infrastruktur sacara swadaya,” ceuk Jenal.

Anjeunna oge ngajelaskeun, nguranganana dana desa di lingkungan masarakat ayeuna lalaunan nimbulkeun karaguan, masarakat geus arapaleun yen dana desa anu samemehna dialokasikeun pikeun pangwangunan infrastruktur ayeuna dialokasikeun pikeun kalanggengan KDMP.

“Ku lumangsungna KDMP ieu, anggaran dana desa eta jadi ngurangan. Ieu tangtu jadi perhatian serius lamun masih loba aspirasi masarakat anu can sapinuhna terealisasi,” pokna neugeuskeun.

Nalika aspirasi warga can kaakomodir, utamana kahayang kana infrastruktur, gerakan gotong royong dianggap saeutik lobana bisa ngajawab kabutuhan warga.

“Sok sanajan hasilna teu maksimal jeung meureun daya tahanna oge kurang nyugemakeun, warga tetep ngajaga jeung ngajunjung luhur gotong royong eta,” ceukna.

Numutkeun Jenal, warga tetep ngajaga gotong royong sabab hayang ngawujudkeun naon anu dipiharep salila ieu, nyaeta masarakat anu maju jeung mekar ku kacumponan fasilitas atawa infrastruktur anu mumpuni pikeun nunjang perekonomian jeung pendidikan.